Slik får du Windows på nynorsk

Dersom du vil ha Windows på nynorsk (og vil unngå at stavekontrollen i Word hoppar over til bokmål heile tida), må du installera ein nynorsk grensesnittpakke, setja nynorsk som Windows-visingsspråk og føretrekt språk og velja nynorsk tastatur. Slik gjer du det:

1. Gå til innstillingar (du finn dei ved å trykkja på startknappen og deretter det vesle tannhjulet).
2. Vel «Tid og språk».
3. Vel «Språk og område» i menyen.
4. Her kan du velja nynorsk som visingsspråk. Dersom nynorsk ikkje ligg inne som eit val i nedtrekksmenyen, kan du lett installera det ved å trykkja på «Legg til et språk» og leita opp «Norsk (nynorsk)».
5. Etter at du har installert nynorsk, må du sjå til at «Norsk (nynorsk)» ligg øvst på lista over føretrekte språk og er sett som Windows-visingsspråk.
6. Pass på at tastaturoppsettet er sett til nynorsk, slik at maskina skjønar at det du skriv, er på nynorsk. Du sjekkar inndataspråket ved å sjå bokstavane som står nede i høgre hjørne på skjermen. Dersom det står NNO der, er alt rett. Dersom det står NOB (eller noko anna), kan du trykkja på bokstavane og velja «NNO Norsk (nynorsk)».