Nynorsksenteret søkjer stipendiat
24.06.2021
![Gruppebilete NYS til nettside](https://nynorsksenteret.no/uploads/images/_700xAUTO_fit_center-center_none/Gruppebilete-NYS_til-nettside.jpg)
Har du eller nokon du kjenner lyst til å bli ein del av det gode arbeidsfellesskapet ved Nynorsksenteret? Vi søkjer stipendiat i nynorskopplæring.
Tekst: Ingvild Myklebust Hovden
Foto: Lea K. Albertsen
Sentarleiar Torgeir Parr Dimmen håper Nynorsksenteret får fleire gode søkjarar til stipendiatstillinga.
– Stillinga skal vere med på å styrke kunnskapsgrunnlaget innanfor nynorskopplæring og bidra til best mogleg kvalitet på Nynorsksenteret sitt arbeid med å utvikle og formidle læringsressursar til bruk i grunnopplæringa og lærarutdanninga. Vi er opne for mange slags framlegg til ph.d.-prosjekt, seier han.
Søknadsfristen er utvida til 1. september 2021.
Lenke til stillinga som er utlyst.
![Pernille Fiskerstrand Beskjært](https://nynorsksenteret.no/uploads/images/_700xAUTO_fit_center-center_none/pernille_fiskerstrand_beskjært.jpg)
Tidlegare stipendidat
Tidlegare stipendidat Pernille Fiskerstrand synest det er viktig at det blir forska på nynorskopplæring. Pernille Fiskerstrand er førsteamanuensis ved institutt for språk og litteratur ved Høgskulen i Volda. Frå august 2010 til desember 2015 var ho stipendiat ved Nynorsksenteret. Ho disputerte ved Universitetet i Bergen med ei avhandling om tverrfagleg skriveopplæring på vidaregåande.
– Korleis var det å vere stipendiat ved Nynorsksenteret?
– Det å vere stipendiat på Nynorsksenteret var veldig fint. Det å ha noko av den beste nynorskkompetansen i landet rundt på nabokontora var ein stor bonus. I tillegg var det veldig nyttig å ha kollegaar som var engasjerte i det eg heldt på med, og som eg kunne diskutere idear og utfordringar med, seier Pernille Fiskerstrand.
Ho legg til at utfordringa med å vere stipendiat i Volda er at ein må vere budd på å reise ein del.
– Ein må rekne med å ha hovudrettleiar ved ein annan institusjon, og elles reise for å delta på kurs i opplæringsdelen. Men på den andre sida er det ikkje så dumt å måtte kople seg på eit større fagmiljø ved eit eksternt universitet, meiner ho.
Viktig fagfelt
Pernille Fiskerstrand synest det er viktig at det blir forska på nynorskopplæring.
– Eg brenn for nynorskdidaktikken fordi det er einaste vegen inn i framtida for nynorsk. Samfunnet som elevane i dag veks opp i, endrar seg så raskt og premissane for å kunne skrive slik ein mottakar forstår og forventar, er dermed også i stadig endring. Dei gamle metodane må dermed bytast ut med forskingsbasert kunnskap, og desse metodane treng vi tid og rom til å forske fram, forklarer ho.
Fiskerstrand hadde 25 % pliktarbeid for Nynorsksenteret i perioden då ho var stipendidat.
– På Nynorsksenteret fungerte dette veldig fint fordi arbeidsmengda er så oversikteleg og lett å planlegge. Dessutan var det av og til godt å kople om, og gjere noko anna. I tillegg kunne eg bruke teorien eg las og skreiv om, i foredrag for lærarar og liknande, fortel Fiskerstrand.