Storstilt Les for meg-utprøving

Frå venstre høgskulelektor Anne Marta V. Vadstein (Nynorsksenteret), professor Per Henning Uppstad (Nasjonalt lesesenter), stipendiat Karianne Megard Grønli (Nasjonalt lesesenter), prosjektleiar og førsteamanuensis Bente R. Walgermo (Nasjonalt lesesenter) og førsteamanuensis Liv Kristin Bjørlykke Øvereng (Nynorsksenteret). (Foto: Nynorsksenteret)

Forskingsprosjektet Les for meg handlar om å vurdere lesinga til barn medan dei les tekstar som engasjerer. Materiellet er utvikla parallelt på nynorsk og bokmål.

Les for meg er materiell som er utarbeidd for å følgje opp elevar som strevar med lesing. Materiellet er utvikla som oppfølging til kartleggingsprøvene på 1. og 3. trinn. Tidlegare har materiellet blitt testa ut på skular i bokmålsområde. 

– No er vi svært glade for at materiellet blir testa ut på skular i nynorskområde, seier høgskulelektor Anne Marta V. Vadstein på Nynorsksenteret ved Høgskulen i Volda.

Materiellet, som er basert på forsking, har blitt utvikla parallelt på nynorsk og bokmål heilt frå starten.

– Språket i tekstane er dermed tilpassa nynorskelevane. Denne utprøvinga vil gi oss viktig innsikt i korleis vi kan styrke leseopplæringa til nynorskelevane, seier førsteamanuensis Liv Kristin Bjørlykke Øvereng ved Nynorsksenteret. 

Om prosjektet

Prosjektet vert gjennomført i samarbeid med norske lærarar og elevar på 1.–4. trinn. Det er finansiert av Noregs Forskingsråd. Målet er å utvikle eit verktøy som lærarane kan bruke for å vere tettare på leseprogresjonen til elevane, og å gi lærarane meir kunnskap om kva motivasjon betyr for leseutviklingane til elevane.

– Leseferdigheiter og motivasjon heng tett saman. Vi ønsker at elevane skal vere engasjerte i lesinga medan dei vert vurderte, seier prosjektleiar Bente R. Walgermo ved Nasjonalt lesesenter. 

Ideen til Les for meg kom som ei oppfølging til kartleggingsprøvene.

– Det handlar om korleis lærarane kan hjelpe dei elevane som strevar med lesing, seier professor Per Henning Uppstad.

I Les for meg prøver forskarar og lærarar ut ein metode for å legge merke til kva eleven strevar med, men utan at eleven får opplevinga av å bli vurdert. I denne metoden får læraren to verktøy: eitt verktøy for presist å legge merke til kva eleven strevar med, og eitt verktøy for å velje ut kva slags tilbakemelding ein skal gi til eleven slik at eleven får lyst til å lære og lese meir. Lærarane får tilgang til ei sjekkliste for kartlegging. Dei kan bruke lista som støtte for kartlegging før og etter lesing. 

Motivasjon

Stipendiat Karianne Megard Grønli ved Nasjonalt lesesenter forskar på kva motiverande tilbakemeldingar ein kan gi til elevar, slik at dei får lyst til å lære meir.

– Lesing handlar om mykje meir enn berre bokstavar og ord. Lesing handlar om å forstå, å bli interessert og å kople på eleven. I materiellet får lærarane gode tips til korleis dei kan snakke med elevane og gi gode tilbakemeldingar til dei som lærer å lese, fortel Grønli.

Les for meg er eit materiell som inneheld fleire av dei faktorane som er viktige når elevar skal lære å lese.  

– Med materiellet ønsker vi å auke motivasjonen og interessa til elevane for lesing medan dei vert kartlagde, seier Grønli.  

Dei er opptekne av den rolla eleven har under kartlegging. 

– Det skal vere elevane som er aktive og viser kva dei kan, dei skal få seie kva dei meiner og tenker om teksten. Lærarane seier at dei får hjelp til å sleppe elevane meir fram, seier Grønli.

Bokeske

Lærarane som testar ut oppfølgingsmateriellet til Les for meg denne våren, får utdelt ei bokeske. Ho inneheld fire ulike bøker som er nyskrivne av Bjørn Arild Ersland og illustrerte av Øyvind Torseter. Kvar forteljing finst i tre utgåver med ulik tekstmengde. På den måten kan læraren velje kva nivå dei meiner passar til kvar enkelt elev. Framsidene og illustrasjonane i dei tre bokutgåvene er like. Dei er ikkje merkte med lesenivå i form av tal. Læraren får oversikt over kva nivå bøkene ligg på, ved hjelp av ei diskret merking på baksida, utan at det vert gjort eit poeng av kva nivå det er, for elevane. 

– Det unike med Les for meg er at eleven ikkje skal ha følelsen av å bli vurdert. Læraren får veldig god informasjon om eleven og kor han skal vidare. Målet er at elevane skal få ei god leseoppleving, seier prosjektleiar Bente R. Walgermo. 

Tilbakemeldingane frå lærarane er positive.

– Dei lærarane som har prøvd ut Les for meg, har likt det veldig godt. Dei synest sjekklista fungerer som ei fin støtte og påminning til det dei jobbar med i det daglege. Sjekklista hjelper lærarane med å sjå heilskapen i lesesituasjonen, seier Grønli.

Kontaktpersonar ved Nynorsksenteret ved Høgskulen i Volda:
Førsteamanuensis Liv Kristin Bjørlykke Øvereng
liv.kristin@nynorsksenteret.no

Høgskulelektor Anne Marta Vinsrygg Vadstein 
anne.marta@nynorsksenteret.no