Opptak frå nettseminar om UH-språk

Tysdag 15. mars arrangerte Høgskulen i Volda, Nynorsksenteret og Nynorsk kultursentrumnasjonalt nettseminar om Språklova og om korleis engelsk og norsk blir brukt i utdanning, forsking og formidling ved norske UH-institusjonar. Her finn du eit redigert opptak frå seminaret.

Målgruppa for nettseminaret var først og fremst tilsette ved norske høgskular og universitet. Målsetjinga var at det skulle vere eit bidrag i arbeidet med å styrke norsk som fagspråk. Over hundre personar frå heile landet deltok på seminaret.

– Vi er godt nøgde, både med deltakinga og med innhaldet. Vi fekk tydeleg fram utfordringa sektoren har med å ta vare på norsk som fagspråk, og at regjeringa og språkrådet no skjerpar krava til språkbruk ved universiteta og høgskulane, seier Torgeir Parr Dimmen, senterleiar ved Nynorsksenteret.

Innleiarane hadde ulike perspektiv på temaet, noko som la grunnlaget for ein interessant debatt om dei overordna rammevilkåra for økonomi og akademisk karriere som favoriserer engelsk framfor norsk i mange fagmiljø.

Innleiarar

Åse Wetås, direktør Språkrådet
Oddmund Løkensgard Hoel, statssekretær Kunnskapsdepartementet
Alexander H. Sandtorv, 1. amanuensis, Institutt for organisk kjemi, UiO
Sluttkommentar:
Jan Inge Sørbø, professor, Institutt for sosialfag, Høgskulen i Volda

Bakgrunnsdokument

• Språklova
• Språkkrav i tildelingsbreva til UH-institusjonane
• Aktuell kronikk av Åse Wetås: Universiteta har ansvar for å ta vare på norsk språk i akademia
• Intervju i Universitetsavisa med Åse Wetås: Opplever at språkdebatten er heftigst ved NTNU
• Intervju i Khrono med Alexander Sandtorv: Forskere vil skrive fag­bøker i arbeids­tida

Program

13.00–13.05: Velkomen ved HVO-prorektor Odd Helge Mjellem Tonheim
13.05–13.30: Språkdirektør Åse Wetås: Språklova og språkpolitikken: Skjerpa krav til arbeid med norsk fagspråk (20 min + 5 min spørsmål)
13.30–13.55: Statssekretær Oddmund Løkensgard Hoel: Nytt løft for norsk språk i høgare utdanning og forsking (20 min + 5 min spørsmål)
Pause
14.00–14.25: Førsteamanuensis Alexander H. Sandtorv: Norsk fagspråk – erfaringer som forfatter og foreleser (20 min + 5 min spørsmål)
14.25–14.45: Plenumsrunde med innleiarane: Moderatorstyrte spørsmål frå seminardeltakarane
14.45–14.55: Oppsummerande kommentar ved professor Jan Inge Sørbø
14.55–15.00: Takk og slutt

Om innleiarane

Åse Wetås har vore direktør i Språkrådet sidan 2015. Ho har doktorgrad i nordisk språkvitskap og har tidlegare vore prosjektdirektør for Norsk Ordbok 2014.

Oddmund Løkensgard Hoel er statssekretær for forsknings- og høgare utdanningsminister Ola Borten Moe (Sp). Han har no permisjon frå stillinga si som professor i historie ved Høgskulen på Vestlandet.

Alexander H. Sandtorv er 1. amanuensis ved Institutt for organisk kjemi ved Universitetet i Oslo. Han er oppteken av formidling og er aktiv som forfattar både for barn og vaksne. Han skriv ei fast spalte i Morgenbladet kvar veke og lagar podkastserien Tingenes tilstand med Kristopher Schau.

Jan Inge Sørbø er professor ved Institutt for sosialfag ved Høgskulen i Volda. Han er også forfattar og kommentator. Sørbø gjekk frå journalistikk til vitskap og har mellom anna skrive den første samla framstillinga om nynorsk skjønnlitteratur.