Vanlege spørsmål

Her finn du svar på vanlege spørsmål.

Kvar finn eg gode nynorske bøker for aldersgruppa?

• På Nynorskbok.no kan du finne omtalar av hundrevis av gode bøker for ulike aldersgrupper.
• Dersom det er bøker du ikkje finn i den lokale bokhandelen, kan du stort sett få tak i dei frå Handlenett.no eller andre nettbokhandlar. Eller få biblioteket til å låne dei inn for deg.

Kvar finn eg kjeldestoff på nynorsk?

• Framtida er ei nynorsk nettavis for unge.
• Nynorsk Wikipedia er eit dugnadsbasert nettleksikon.

Kvar finn eg nynorskordlister og ordbøker på nett?

• Nynorskordboka – ei nettordbok som viser skrivemåtar og bøying i tråd med dei gjeldande normene
• Lexin – fleirspråklege ordbøker
• Frå bokmål til nynorsk – ordliste frå Språkrådet som viser kva ulike bokmålsord heiter på nynorsk

Kvar finn eg grammatikkøvingar på nett?

Språkrådet har laga eit nynorsk øvingsrom for elevar. Du finn øvingane på elevrom.sprakradet.no.

Kven kan få fritak frå vurdering med karakter i skriftleg sidemål?

Berre elevar som har opplæring i samisk, teiknspråk eller har særskild språkopplæring på ungdomsskulen, kan få fritak frå opplæring i skriftleg sidemål.

Elevar som har vanskar med å lære både bokmål og nynorsk på grunn av dokumentert sjukdom, skade eller dysfunksjon, kan etter enkeltvedtak få fritak for vurdering med karakter i det skriftspråket dei har som sidemål. Det same gjeld elevar som ikkje har gått norsk grunnskule på 8. til 10. trinn, har hatt særskild språkopplæring på 8. til 10. trinn eller i vidaregåande opplæring, eller som på 8. til 10. trinn eller i den vidaregåande opplæringa har gått på ein internasjonal eller utanlandsk skule i Noreg som er godkjend for ikkje å gje vurdering med karakter i sidemål. Berre skulen eller fylkeskommunen som kan skrive ut vitnemål for den det gjeld, kan gjere enkeltvedtak om fritak frå vurdering i skriftleg sidemål. Fylkeskommunen skal sjå til at elevane (og foreldra, dersom eleven er under 18 år) får naudsynt rettleiing om kva fritak frå vurdering med karakter inneber, før det vert gjeve slikt fritak.

Elevar som er fritekne frå vurdering med karakter, er ikkje fritekne frå opplæringa, og skal ha halvårsvurdering og anna undervegsvurdering utan karakter.

Les meir i opplæringslova § 6-1 og i forskrifta til opplæringslova § 9-18 og § 9-21.

Kva reglar gjeld for retten til læremiddel på eige skriftspråk?

Eleven har rett til læremiddel på ønskt skriftspråk. Skulen har ikkje lov til å ta i bruk læremiddel som ikkje ligg føre på bokmål og nynorsk til same tid. Les meir i opplæringslova.

Er det andre reglar for digitale læremiddel enn for læremiddel på papir?

Nei. Opplæringslova seier at dei same krava gjeld for digitale læremiddel som for læremiddel på papir.

Kva reglar gjeld for skriveprogram?

Opplæringslova slår fast at skriveprogram som skal nyttast i skulen, må støtte både nynorsk og bokmål og følgje offisiell rettskriving. Med skriveprogram er det meint alle læringsverktøy og tekstbehandlingsprogram med tekststøtte, rettefunksjonar o.l.