God nynorskopplæring for alle
Meny

Teikn livet mitt: Ivar Aasen

I dette undervisningsopplegget skal elevane arbeide kreativt og utforskande med den historiske bakgrunnen for språksituasjonen i Noreg, med særleg vekt på Ivar Aasen.

Teikn livet mitt
Teikning: Dina Rahmani, elev 3PBB, Steinkjer vgs.

Elevane skal bruke læreboka si, i tillegg til kjeldene som er lista opp under, for å skaffe seg kunnskap om Aasen og språksynet hans. Læraren kan velje om alle kjeldene skal brukast, eller om elevane kan velje nokre sjølve.  

Elevane skal lage ein såkalla “Draw My Life”-video (teikn-livet-mitt-video). Dette er ein sjanger frå You-Tube der ein fortel livshistoria til ein kjent person gjennom enkle strekteikningar, kombinert med munnleg forteljing. Elevane kan bruke tavla eller ark. Før filming bør elevane ha:  

  1. laga ei dreiebok/disposisjon med dei viktigaste hendingane i livet til Ivar Aasen
  2. planlagt kva som skal teiknast, og kva som skal seiast til kvar del  

Når planlegginga er ferdig, filmar elevane teikninga i eitt samanhengande opptak, til dømes med mobiltelefon eller datamaskin. Etterpå kan dei:  

  • justere tempoet på videoen
  • leggje på forklarande lydspor
  • eventuelt bruke musikk som lydspor 

Læraren bør vise eitt eller fleire døme for å gje elevane eit bilete på kva teikn-livet-mitt-videoar er:  

Ark til elevane

  • Kompetansemål

    Undervisningsopplegget kan enkelt tilpassast både ungdomsskulen og vidaregåande skule, og er forankra i følgjande kompetansemål i norskfaget:  

    10. trinn

    Oppgåva gjev elevane høve til å forklare den historiske bakgrunnen for bokmål og nynorsk og reflektere over statusen til dei offisielle språka i Noreg i dag, gjennom både visuelt og munnleg arbeid.

    Vg1 (studieførebuande)

    Elevane får arbeide med å kombinere verkemiddel og uttrykksformer kreativt i eigen tekstskaping, ved å bruke teikning, munnleg forteljing og musikk i ein samansett tekst.  

    Vg2 (studieførebuande)

    Opplegget legg til rette for at elevane kan gjere greie for den historiske bakgrunnen for språksituasjonen i Noreg i dag og bruke fagkunnskap og retoriske ferdigheiter i munnlege presentasjonar.